2016 جىلعى 14 قاڭتار, استانا قالاسى
ورتا ءبىلىم بەرۋ ۇيىمدارى ءۇشىن مىندەتتى مەكتەپ فورماسىنا قويىلاتىن
تالاپتاردى بەكىتۋ تۋرالى
«ءبىلىم تۋرالى» 2007 جىلعى 27 شىلدەدەگى قازاقستان رەسپۋبليكاسى زاڭىنىڭ 5-بابىنىڭ 14-1) تارماقشاسىنا سايكەس بۇيىرامىن:
1. قوسا بەرىلىپ وتىرعان ورتا ءبىلىم بەرۋ ۇيىمدارى ءۇشىن مىندەتتى مەكتەپ فورماسىنا قويىلاتىن تالاپتار بەكىتىلسىن.
2. مەكتەپكە دەيىنگى جانە ورتا ءبىلىم, اقپاراتتىق تەحنولوگيالار دەپارتامەنتى (ج.ا. جونتاەۆا) زاڭنامادا بەلگىلەنگەن تارتىپپەن:
1) وسى بۇيرىقتىڭ قازاقستان رەسپۋبليكاسى ادىلەت مينيسترلىگىندە مەملەكەتتىك تىركەلۋىن;
2) وسى بۇيرىقتى قازاقستان رەسپۋبليكاسى ادىلەت مينيسترلىگىندە مەملەكەتتىك تىركەۋدەن وتكەننەن كەيىن كۇنتىزبەلىك ون كۇن ىشىندە مەرزىمدى باسپا باسىلىمدارىندا جانە «ادىلەت» اقپاراتتىق-قۇقىقتىق جۇيەسىندە رەسمي جاريالاۋعا, سونداي-اق قازاقستان رەسپۋبليكاسى نورماتيۆتىك قۇقىقتىق اكتىلەرىنىڭ ەتالوندىق باقىلاۋ بانكىندە ورنالاستىرۋ ءۇشىن «قازاقستان رەسپۋبليكاسى ادىلەت مينيسترلىگىنىڭ رەسپۋبليكالىق قۇقىقتىق اقپارات ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنىنا جولداۋدى;
3) وسى بۇيرىقتى قازاقستان رەسپۋبليكاسى ءبىلىم جانە عىلىم مينيسترلىگىنىڭ رەسمي ينتەرنەت-رەسۋرسىندا ورنالاستىرۋدى;
4) قازاقستان رەسپۋبليكاسى ادىلەت مينيسترلىگىندە مەملەكەتتىك تىركەۋدەن وتكەننەن كەيىن ون كۇن ىشىندە وسى تارماقتىڭ 1), 2) جانە 3) تارماقشالارىندا قاراستىرىلعان ءىس-شارالاردىڭ ورىندالۋى تۋرالى مالىمەتتەردى قازاقستان رەسپۋبليكاسى ءبىلىم جانە عىلىم مينيسترلىگىنىڭ زاڭ دەپارتامەنتىنە ۇسىنۋدى قامتاماسىز ەتسىن.
3. وسى بۇيرىقتىڭ ورىندالۋىن باقىلاۋ قازاقستان رەسپۋبليكاسىنىڭ ءبىلىم جانە عىلىم ۆيتسە-ءمينيسترى ە.ن.يمانعاليەۆكە جۇكتەلسىن.
4. وسى بۇيرىق العاشقى رەسمي جاريالانعان كۇنىنەن باستاپ كۇنتىزبەلىك ون كۇن وتكەن سوڭ قولدانىسقا ەنگىزىلەدى.
قازاقستان رەسپۋبليكاسى ءبىلىم جانە عىلىم ءمينيسترى ا.ءسارىنجىپوۆ
قازاقستان رەسپۋبليكاسى ءبىلىم مەن عىلىم ءمينيسترىنىڭ 2016 جىلعى 14 قاڭتارداعى №26 بۇيرىعىمەن بەكىتىلگەن
ورتا ءبىلىم بەرۋ ۇيىمدارىندا مىندەتتى مەكتەپ فورماسىنا قويىلاتىن تالاپتار
1. جالپى ەرەجەلەر
1. وسى ورتا ءبىلىم بەرۋ ۇيىمدارىندا مىندەتتى مەكتەپ فورماسىنا قويىلاتىن تالاپتار (بۇدان ءارى – تالاپتار) «ءبىلىم تۋرالى» 2007 جىلعى 27 شىلدەدەگى قازاقستان رەسپۋبليكاسى زاڭىنىڭ 5-بابىنىڭ 14-1) تارماقشاسىنا سايكەس ءبىلىم الۋشىلاردى ساپالى مەكتەپ فورماسىمەن قامتاماسىز ەتۋ ماقساتىندا ازىرلەندى.
جوعارىدا اتالعان تالاپتار ءبىلىم بەرۋدىڭ زايىرلى سيپاتىن ىسكە اسىرۋعا جانە ورتا ءبىلىم بەرۋ ۇيىمدارى ءبىلىم الۋشىلارىنىڭ اراسىندا الەۋمەتتىك, م ۇلىكتىك جانە باسقا دا وزگەشەلىكتەردىڭ بەلگىلەرىن جويۋعا باعىتتالعان.
2. وسى تالاپتاردا مىناداي نەگىزگى ۇعىم قولدانىلادى:
ورتا ءبىلىم بەرۋ ۇيىمى – باستاۋىش, نەگiزگi ورتا, جالپى ورتا ءبiلiمنىڭ جالپى بiلiم بەرەتىن وقۋ باعدارلامالارىن, مامانداندىرىلعان جالپى ءبىلىم بەرەتىن جانە ارنايى وقۋ باعدارلامالارىن iسكە اسىراتىن وقۋ ورنى.
3. تالاپتاردىڭ ماقساتى – مىندەتتى مەكتەپ فورماسىن قولدانۋدا ورتا ءبىلىم بەرۋ ۇيىمدارىنىڭ بىرىڭعاي كەلىسىمىن قامتاماسىز ەتۋ, اتا-انالاردىڭ مەكتەپ فورماسىنا جاعىمدى قاتىناسىن قالىپتاستىرۋ, وقىتۋدىڭ زايىرلى سيپاتىن ساقتاۋدا وقۋ ورنى باسشىلارىنىڭ جانە قوعامدىق كەڭەستەردىڭ (مەكتەپ كەڭەسى, قامقورشىلىق كەڭەس, اتا-انالار كوميتەتى) جاۋاپكەرشىلىگىن ارتتىرۋ.
4. مىندەتتى مەكتەپ فورماسىنا قويىلاتىن تالاپتار ورتا ءبىلىم بەرۋ ۇيىمدارىنىڭ فويەسىندە, ال تانىستىرۋ ماقساتىندا ورتا ءبىلىم بەرۋ ۇيىمدارىنىڭ ينتەرنەت-رەسۋرستارىندا جاريالانادى.
2. ورتا ءبىلىم بەرۋ ۇيىمدارىنداعى مىندەتتى مەكتەپ فورماسىنا قويىلاتىن تالاپتار
5. ورتا ءبىلىم بەرۋ ۇيىمدارىنىڭ مىندەتتى مەكتەپ فورماسى (بۇدان ءارى – مەكتەپ فورماسى) وقىتۋدىڭ زايىرلى سيپاتىنا سايكەس كەلەدى. مەكتەپ فورماسىنىڭ ۇلگىسى, ءتۇسى كلاسسيكالىق ستيلدە, بىرىڭعاي ءتۇس گامماسىندا جاسالادى, ۇشەۋدەن اسىرماي تۇستەردى ارالاستىرۋعا رۇقسات ەتىلەدى. مەكتەپ فورماسىنىڭ ءتۇسى قالىپتى جانە اشىق ەمەس تۇستەردەن تاڭدالادى.
6. مەكتەپ فورماسى ءبىلىم الۋشىلاردىڭ جاس ەرەكشەلىكتەرىنە قاراي ەنگىزىلەدى.
7. مەكتەپ فورماسى كۇندەلىكتى, مەرەكەلىك جانە سپورتتىق بولىپ بولىنەدى.
8. ۇلداردىڭ مەكتەپ فورماسى:
پيدجاك, جيلەت, شالبار, مەرەكەلىك جەيدە, كۇندەلىكتى جەيدە (قىسقى مەزگىلدە: تريكوتاج جيلەت, ۆودولازكا). ۇلدارعا ارنالعان شالبارلار ەركىن تىگىلگەن جانە ۇزىندىعى بويىنشا توبىقتى جاۋىپ تۇرادى.
9. قىزداردىڭ مەكتەپ فورماسى:
پيدجاك, جيلەت, يۋبكا, شالبار, كلاسسيكالىق جەيدە (قىسقى ۋاقىتتا: تريكوتاج جيلەت, سارافان, ۆودولازكا). قىزدارعا ارنالعان شالبارلار ەركىن تىگىلگەن جانە ۇزىندىعى بويىنشا توبىقتى جاۋىپ تۇرادى.
10. ۇلداردىڭ مەرەكەلىك فورماسى كۇندەلىكتى فورماعا قوسىمشا اق جەيدەدەن, قىزدار ءۇشىن اق ءتۇستى بلۋزكادان قۇرالادى.
11. ۇلدار مەن قىزدارعا ارنالعان سپورتتىق فورما سپورتتىق كوستيۋمنەن (سپورتتىق شالبار, كۋرتكا, فۋتبولكا), سپورتتىق اياق كيىمنەن (كراسسوۆكا, كەدى) تۇرادى.
12. مەكتەپ فورماسىنا كلاسسيكالىق پىشىندەگى مەكتەپ فورماسىنىڭ نەگىزگى تۇسىنە سايكەس نەمەسە كەرەعار كەلەتىن گالستۋك تىگىلەدى.
13. مەكتەپ فورماسىنا ءتۇرلى كونفەسسيالارعا قاتىستى كيىم ەلەمەنتتەرىن قوسۋعا بولمايدى. ورتا ءبىلىم بەرۋ ۇيىمىندا كەز كەلگەن ءدىني كونفەسسياعا قاتىناسىن بىلدىرەتىن ءدىني كيىمدەردى (حيدجاب, نيكاب, بۋركا, پارانجا, سيكح تيۋرباندارى جانە يۋدەي كيپا-باس كيىمدەرى جانە ت.ب ) جانە كەز كەلگەن ءدىني اتريبۋتيكالاردى (بەلگىلەردى) كيۋگە تىيىم سالىنعان.
14. مەكتەپ فورماسىنا ورتا ءبىلىم بەرۋ ۇيىمىنىڭ ەرەكشەلىك بەلگىلەرىن (بەلگىلەر, تىگىسپەلەر جانە ت.ب.) سالۋعا بولادى. ولار كيىمنىڭ نەمەسە اكسەسسۋاردىڭ (پيدجاك, جيلەت, گالستۋك) جوعارعى بولىگىندە ورنالاسادى.
15. مەكتەپ فورماسىنا قويىلاتىن تالاپتار كليماتتىق جاعداي, وقۋ ساباقتارىنىڭ وتكىزىلۋ ورنى جانە وقۋ عيماراتىنداعى تەمپەراتۋرالىق رەجيم ەسكەرىلىپ, ىسكە اسىرىلادى.
16. مەكتەپ فورماسىنا قويىلاتىن تالاپتار بويىنشا جاراقاتتايتىن فۋرنيتۋراسى بار كيىم مەن اكسەسسۋارلار كيۋگە تىيىم سالىنادى.
17. مەكتەپ فورماسىن ەنگىزۋ بارىسىندا ماتا قۇرامىنا نازار اۋدارىلادى.
18. مەكتەپ فورماسىنىڭ ماتاسى رەتىندە قاسيەتتەرى جاقسارتىلعان جارتىلاي ءجۇن جانە ماقتا, كيىسكە ءتوزىمدى, انتيباكتەريالدىق, انتيميكروبتىق جانە انتيستاتيكالىق قاسيەتتەرى بار ماتالار قولدانىلادى.
19. مەكتەپ فورماسىنىڭ ءتۇسىن, فاسونىن تاڭداۋدى جانە يۋبكانىڭ ۇزىندىعىن ورتا ءبىلىم بەرۋ ۇيىمى مەن قوعامدىق كەڭەس ايىقىندايدى, جالپىمەكتەپتىك اتا-انالار جينالىسىنىڭ حاتتاماسىمەن بەكىتىلەدى.
20. مەكتەپ فورماسىنا وزگەرىستەر ەنگىزۋ تۋرالى شەشىم قوعامدىق كەڭەسپەن كەلىسۋ ارقىلى قابىلدانادى.
21. اتا-انالار جانە وزگە زاڭدى وكىلدەر ءبىلىم الۋشىلاردىڭ ورتا ءبىلىم بەرۋ ۇيىمىندا بەلگىلەنگەن مەكتەپ فورماسىن كيۋىنە جاۋاپ بەرەدى.
3. ورتا ءبىلىم بەرۋ ۇيىمدارىندا مىندەتتى مەكتەپ فورماسىنا قويىلاتىن تالاپتاردى ورىنداۋ
22. ورتا ءبىلىم بەرۋ ۇيىمىنىڭ باسشىسى (بۇدان ءارى – باسشى) جانە قوعامدىق كەڭەس (مەكتەپ كەڭەسى, قامقورشىلىق كەڭەس, اتا-انالار كوميتەتى) مىندەتتى مەكتەپ فورماسىن ەنگىزۋ كەزىندە وسى تالاپتاردى باسشىلىققا الادى.
23. اتا-انالار مەن وزگە دە زاڭدى وكىلدەر مەكتەپ فورماسى تۋرالى ماسەلەلەردى تالقىلاۋعا قاتىسادى جانە ونى جەتىلدىرۋ بويىنشا ۇسىنىس ەنگىزەدى, ونى كەز كەلگەن ساۋدا جەلىسىنەن ساتىپ الادى.
24. وبلىستاردىڭ, استانا جانە الماتى قالالارىنىڭ ءبىلىم باسقارمالارى, اۋداندىق (قالالىق) ءبىلىم بولىمدەرى اتا-انالارعا مەكتەپ فورماسىن وتاندىق مەكتەپ فورماسىن شىعاراتىن وندىرۋشىلەردەن ساتىپ الۋدى ۇسىنادى, بىراق ولاردى ناقتى وندىرۋشىلەردەن ساتىپ الۋدى مىندەتتەمەيدى نەمەسە وقۋ ورنىندا فورما ساتۋدى ۇيىمداستىرمايدى.
25. باسشى اعىمداعى جىلعى 25 مامىرعا دەيىن مەكتەپ فورماسىنىڭ بەكىتىلۋىن قامتاماسىز ەتەدى.
26. باسشى ءبىلىم الۋشىلاردىڭ مەكتەپ فورماسىن ساقتاۋى ماسەلەسىن قوعامدىق كەڭەستىڭ تالقىلاۋىنا شىعارادى.
27. باسشى وسى تالاپتارمەن اتا-انالاردى نەمەسە زاڭدى وكىلدەردى ءبىلىم الۋشىنى ءبىلىم بەرۋ ۇيىمىنا قابىلداۋ تۋرالى ءوتىنىش (ەركىن نىساندا) بەرۋ كەزىندە قول قويعىزۋ ارقىلى جانە جالپى مەكتەپتىك اتا-انالار جينالىسىندا تانىستىرادى.
بۇيرىق قازاقستان رەسپۋبليكاسىنىڭ ادىلەت مينيسترلىگىندە 2016 جىلعى 16 اقپاندا نورماتيۆتىك قۇقىقتىق كەسىمدەردى مەملەكەتتىك تىركەۋدىڭ تىزىلىمىنە №13085 بولىپ ەنگىزىلدى.